Ghazal

[Muhammad ayaz]

یونہی بے سبب نہ پھرا کرو، کوئی شام گھر بھی رہا کرو

وہ غزل کی سچی کتاب ہے ، اسے چپکے چپکے پڑھا کرو

کوئی ہاتھ بھی نہ ملائیگا، جو گلے ملو گے تپاک سے

یہ نئے مزاج کا شہر ہے ، ذرا فاصلے سے ملا کرو

ابھی راہ میں کئی موڑ ہیں، کوئی آئے گا کوئی جائے گا

تمھیں جس نے دل سے بھلا دیا ، اسے بھولنے کی دعا کرو

مجھے اشتہار سی لگتی ہیں، یہ محبتوں کی کہانیاں

جو کہا نہیں وہ سنا کرو ، جو سنا نہیں وہ کہا کرو

یہ خزاں کی زرد سی شام میں، جو اُداس پیڑ کے پاس ہے

یہ تمہارے گھر کی بہار ہے،اسے آنسووں سے “ہرا” کرو

کبھی حسنِ پردہ نشیں بھی ہو ، ذرا عاشقانہ لباس میں

جو میں بن سنور کے کہیں چلوں ، میرے ساتھ تم بھی چلا کرو

نہیں بےحجاب وہ چاند سا ، کہ نظر کا کوئی اثر نہیں

اسے اتنی گرمیِ شوق سے بڑی دیر تک نہ “تکا” کرو

- بشیر بدر-

[Muhammad ayaz]

دل عشق میں بے پایاں، سودا ہو تو ایسا ہو

دریا ہو تو ایسا ہو، صحرا ہو تو ایسا ہو

اک خال سویدا میں، پہنائی دو عالم

پھیلا ہو تو ایسا ہو، سمٹا ہو تو ایسا ہو

اے قیس جنوں پیشہ، انشا کو کبھی دیکھا؟

وحشی ہو تو ایسا ہو، رسوا ہو تو ایسا ہو

دریا بہ حباب اندر، طوفاں بہ سحاب اندر

محشر بہ حجاب اندر، ہونا ہو تو ایسا ہو

ہم سے نہیں رشتہ بھی، ہم سے نہیں ملتا بھی

ہے پاس وہ بیٹھا بھی، دھوکا ہو تو ایسا ہو

وہ بھی رہا بیگانہ، ہم نے بھی نہ پہچانا

ہاں اے دل دیوانہ، اپنا ہو تو ایسا ہو

اس درد میں کیا کیا ہے، رسوائی بھی لذت بھی

کانٹا ہو تو ایسا ہو، چبھتا ہو تو ایسا ہو

ہم نے یہی مانگا تھا، اس نے یہی بخشا ہے

بندہ ہو تو ایسا ہو، داتا ہو تو ایسا ہو

ابن انشاء

[Muhammad ayaz]

نہ شب و روز ہی بدلے ہیں نہ حال اچھا ہے
کس برہمن نے کہا تھا کہ یہ سال اچھا ہے
ہم کہ دونوں کے گرفتار رہے، جانتے ہیں
دامِ دنیا سے کہیں زلف کا جال اچھا ہے
میں نے پوچھا تھا کہ آخر یہ تغافل کب تک؟
مسکراتے ہوئے بولے کہ سوال اچھا ہے
دل نہ مانے بھی تو ایسا ہے کہ گاہے گاہے
یارِ بے فیض سے ہلکا سا ملال اچھا ہے
لذتیں قرب و جدائی کی ہیں اپنی اپنی
مستقل ہجر ہی اچھا نہ وصال اچھا ہے
رہروانِ رہِ اُلفت کا مقدر معلوم
ان کا آغاز ہی اچھا نہ مال اچھا ہے
دوستی اپنی جگہ، پر یہ حقیقت ہے فراز
تیری غزلوں سے کہیں تیرا غزال اچھا ہے

[Muhammad ayaz]

رات بھر جاگتا ہی رہتا ہوں
کچھ نہ کچھ سوچتا ہی رہتا ہوں

میری منزل کوئی نہیں پھر بھی
راستہ پُوچھتا ہی رہتا ہوں

اپنی تعمیر دن میں کرتا ہوں
رات بھر ٹوٹتا ہی رہتا ہوں

تجھ سے باتیں ہزار کرنی ہیں
پر تجھے دیکھتا ہی رہتا ہوں

کوئی گوہر بھی مل ہی جائے گا
خاک تو چھانتا ہی رہتا ہوں

اپنے عیبوں پہ ہے نظر باقی
آئینہ دیکھتا ہی رہتا ہوں

[Muhammad ayaz]

شام سے آنکھ میں نمی سی ہے
آج پھر آپ کی کمی سی ہے

دفن کردو ہمیں کہ سانس ملے
نبض کچھ دیر سے تھمی سی ہے

کون پتھّرا گیا ہے آنکھوں میں
برف پلکوں پہ کیوں جمی سی ہے

وقت رہتا نہیں کہیں ٹک کر
اس کی عادت بھی آدمی سی ہے

کوئی رشتہ نہیں رہا پھر بھی
ایک تسلیم لازمی سی ہے

آئیے راستے الگ کر لیں
یہ ضرورت بھی باہمی سی ہے

شاعر : گلزار